Nýr Arnarnesvegur og tengdar framkvæmdir eru óðum að taka á sig mynd. Unnið er við uppsetningu umferðarljósa við gatnamót Breiðholtsbrautar og Arnarnesvegar og er áætlað að opna þennan veghluta fyrir umferð um næstu mánaðamót. Á morgun, fimmtudag, verður umferð færð yfir á syðri akrein milli Jaðarsels og Vatnsendahvarfs vegna framkvæmda við ný vegamót Breiðholtsbrautar og Arnarnesvegar. Vinna við færslu umferðarinnar hefst klukkan 6 að morgni og henni lýkur um kl. 9 á föstudag.
Arnarnesvegur er eitt af stofnvegaframkvæmdum Samgöngusáttmála höfuðborgarsvæðisins, það fjórða af samtals níu. Góður gangur er í framkvæmdunum milli Rjúpnavegar og Breiðholtsbrautar. Nýja brúin yfir Breiðholtsbraut verður brátt tilbúin en þar er unnið að frágangi, ásamt vegtengingum sitt hvoru megin við brúna, eða frá Breiðholtsbraut að Vatnsendavegi. Á brúnni er bæði akbraut og göngu- og hjólastígur.
Skammt frá, eða við vegamót Breiðholtsbrautar og Vatnsendahvarfs, stendur yfir vinna við jarðvegsskipti og í vegstæði Arnarnesvegar, milli Vatnsendavegar og Rjúpnavegar, er unnið við fyllingar og frágang ofanvatnslagna.
Ljósastaurar settir upp
Við göngu- og hjólastíginn, sem verið er að leggja austan við veginn, er unnið við uppsetningu ljósastaura og frágang burðarlags undir malbik. Samhliða þessum framkvæmdum er unnið við malbikun og umhverfisfrágang og þegar er búið að þökuleggja hluta svæðisins.
Bygging nýrrar göngubrúar við Arnarnesveg á móts við Turnahvarf er langt komin og unnið er að lokafrágangi hennar. Við nýju undirgöngin, sem eru í byggingu undir Arnarnesveg við Rjúpnaveg, er unnið við stoðveggi sem koma við enda undirganganna.
Umferðin færð tímabundið
Vegna færslu umferðar um Breiðholtsbraut eru vegfarendur sérstaklega beðnir um að virða merkingar, fylgja hraðatakmörkunum og sýna aðgát við framkvæmdasvæðið.
Verkið heyrir undir Samgöngusáttmálann og er samstarfsverkefni Vegagerðarinnar, Reykjavíkur, Kópavogs, Betri samgangna, Veitna og Mílu. Verktakar eru Suðurverk og Loftorka og VSB sér um eftirlit.
Áætluð verklok Arnarnesvegar og tengdra framkvæmda eru eftir tæplega hálft ár, eða í nóvember 2026.
Ljósmyndir / Vilhelm Gunnarsson